'संकटबाट बच्न विकासोन्मुख देश तयार होऊ'

काठमाडौं-, जेष्ठ ३२ - विश्व अर्थतन्त्रमा देखिने अस्थिरताका कारण विकासोन्मुख मुलुकले आफ्ना लागि पूर्वतयारी गर्नुपर्ने भएको छ ।
विश्व बैंकले मंगलबार सार्वजनिक गरेको विश्व आर्थिक परिदृश्य अनुसार आउने अप्ठेरो समयका लागि विकासोन्मुख मुलुकहरूले मध्यम अवधिको विकास रणनीति अपनाई काम गर्नुपर्ने उल्लेख छ । यो वर्ष विश्वको अर्थतन्त्रमा २ दशमलव ५ प्रतिशतको मात्र वृद्धि हुने जनाएको छ ।
केही समय सुधार देखिए पनि मे महिनाबाट उच्च आम्दानी भएका देशको सेयर बजारमा गिरावट आउन थालेको छ । औद्योगिक वस्तुका मूल्य घटेका छन्, त्यस्तै कच्चा तथा तामा सामग्रीको मूल्य १९ र १४ प्रतिशतले तल झरेको परिदृश्यमा उल्लेख छ । विकासोन्मुख मुलुकले स्वदेशी मुद्राको मूल्य डलरको तुलनामा निकै खस्किँदै गएकाले बढी समस्या देखिने भएको हो ।
यो वर्ष विकासोन्मुख मुलुकको आर्थिक वृद्धिदर ५ दशमलव ३ प्रतिशतको हाराहारीमा हुने अनुमान बैंकले गरेको छ । त्यस्तै २०१३ मा ५ दशमलव ९ र २०१४ मा ६ प्रतिशतले केही सुधार हुँदै जाने अनुमान छ । क्षेत्रका हिसाबमा दक्षिण एसियामा मौदि्रक नीतिको कमजोरी, लोडसेडिङ, वाषिर्क घाटा लगायत कारणले लगानीका गतिविधिमा कमी आउने परिदृश्यमा छ । यी सबै कारणले दक्षिण एसियाको आर्थिक वृद्धि २०१२ मा ६ दशमलव ४ प्रतिशतमा सीमित हुने छ । यो क्षेत्रमा २०११ मा ७ दशमलव १ प्रतिशत आर्थिक वृद्धि भएको थियो ।
त्यस्तै २०१३ मा ६ दशमलव ५ र २०१४ मा ६ दशमलव ७ प्रतिशत आर्थिक वृद्धि हुने अनुमान बैंकले गरेको छ ।
यस्तै स्थितिमा नीति निर्माताले समस्या समाधान र आर्थिक वृद्धि घट्न नदिन दीर्घकालीन पहल गर्नुपर्ने चेतावनी बैंकको छ ।