पूर्ण बजेट आउने संकेत पाएको छुः दाहाल

काठमाडौं, असार २४ - एकीकृत माओवादी अध्यक्ष पुष्पकमल दाहालले दलहरुसँगको छलफलमा आफूले पूर्ण बजेट आउने संकेत पाएको दाबी गरेका छन् ।
'कांग्रेस, एमाले, मधेसी मोर्चासहितका दलहरुसँग जति छलफल भएका छन्,' आइतबार बिहान राष्ट्रपति रामवरण यादवसँगको भेटपछि संवादाताहरुसित दाहालले भने, 'मैले चाँही पूर्ण बजेट आउने नै संकेत पाएको छु ।' भेटमा दाहालले बजेटबारे दलहरुबीच भएका छलफलबारे राष्ट्रपतिलाई जानकारी दिएका थिए ।
मुख्य दलहरुबीच बजेटमा विमति रहेकाबेला दाहालले पनि सहमतिमै बजेट ल्याउनुपर्नेमा जोड दिए । 'घटनाक्रमहरु जसरी देखिएका छन्,' विपक्षी दलको विरोधप्रति दाहालले भने, 'मेरो जोड पनि राजनीतिक दलको सहमति बनाएरमात्रै बजेट ल्याउनुपर्छ भन्ने हो ।'
दाहालले सहमतिमा बजेट ल्याउने जानकारी राष्ट्रपतिलाई गराएको उल्लेख गरे । 'कुराकानी भइरहेका छन्, सहमति भएको छैन,' उनले भने, 'जस्तो खालको बजेट ल्याए पनि सहमतिमै ल्याउनुपर्छ ।'
आर्थिक वर्ष सकिन लाग्दा पनि नयाँ बजेट ल्याउनेबारे दलहरुबीच सहमति भएको छैन । सरकार अध्यादेशबाट पूर्ण बजेट ल्याउने तयारीमा छ तर कांग्रेस, एमालेलगायतका दलहरु पूर्ण बजेटको विपक्षमा छन् । उनीहरुले तृतियांश ल्याउन दिने संकेत गरेका छन् ।
संविधानसभा विघटनपछि संसद् नभएकाले अध्यादेशबाट बजेट ल्याउन सरकारले सहमतिको प्रयास भने जारी नै राखेको छ ।