'बजेट ढिलो गरे विकास बिथोलिन्छ’

काठमाडौं, असार १७ - उद्योग वाणिज्य क्षेत्रसँग सम्बद्ध निकायहरूले समयमा बजेट नआए विकास-निर्माणका काम बिथोलिने बताएका छन् । राष्ट्रिय सहमतिका आधारमा असारभित्रै पूर्ण आकारको बजेट देशले पाउनुपर्नेमा जोड दिँदै ती संस्थाका प्रमुखहरूले राजनीति र आर्थिक विषयलाई पृथकरूपमा सम्बोधन गर्नुपर्ने तर्क गरे ।
आर्थिक गतिविधिलाई ओझेलमा नपार्न र राष्ट्र विकासका लागि संवेदनशील हुन उनीहरूले प्रमुख राजनीतिक दलका नेतृत्वसँग अनुरोध गर्दै कृषिप्रधान देशमा मध्यअसारमा मलको हाहाकार हुनु विडम्बना भएको दुखेसो गरे ।
नेपाल आर्थिक पत्रकार समाज (सेजन) ले आइतबार आयोजना गरेको अर्थसंवाद कार्यक्रममा नेपाल उद्योग वाणिज्य महासङ्घका अध्यक्ष सुरज वैद्यले राजनीतिक मतभिन्नतालाई बजेटमा प्रतिविम्बित नगरी त्यसमा राष्ट्रिय सहमति कायम गर्न दलहरूलाई आग्रह गरे ।
पूर्वाधार विकास, प्रत्यक्ष वैदेशिक लगानी, रोजगारीका अवसरको सिर्जना, कृषि, ऊर्जा र उद्योगको प्रवर्धनलाई बजेटले प्राथमिकता दिनुपर्ने उनले बताए ।
नेपाल चेम्बर अफ कमर्शका अध्यक्ष सुरेश बस्नेतले मुलुकको आर्थिक उन्नयनका निम्ति सबै राजनीतिक पार्टीबीच न्यूनतम साझा कार्यक्रममा सहमति हुनैपर्नेमा जोड दिए ।
बजेटमा आधारित भएर उद्यमी-व्यवसायीले कार्ययोजना बनाउने भएकाले समयमा बजेट नआए देशकै अर्थतन्त्र प्रभावित हुने विचार पनि उनले व्यक्त गरे ।
नेपाल उद्योग परिसङ्घका उपाध्यक्ष नरेन्द्र बस्नेतले अति राजनीतिले मुलुक अधोगतितर्फ उन्मुख भएकोमा चिन्ता व्यक्त गर्दै राजनीतिक दलहरूलाई जिम्मेवार हुन आगह गरे । रासस